BakuTime.com xəbər verir ki, ABŞ hökumətinin yeni maliyyə ili üçün büdcə qəbul edə bilməməsi nəticəsində federal strukturların fəaliyyəti dayandırılıb. Bu proses qlobal maliyyə bazarlarında qeyri-müəyyənliyi artıraraq qiymətli metalların bahalaşmasına səbəb olub.
Hadisələrin fonunda investorlar dolların zəifləməsi riskini nəzərə alaraq təhlükəsiz liman kimi qızıla üz tutublar. Nəticədə, bazarlarda qiymətli metalın dəyəri tarixi göstəriciləri üstələyib.
Nyu-York Ticarət Birjasında (COMEX) dekabr ayı üzrə qızıl fyuçerslərinin qiyməti 0,72% bahalaşaraq hər Trua unsiyası üçün 3 901,20 dollar olub. Bu, tarixdə ilk dəfə olaraq qızılın 3 900 dollar həddini keçməsi kimi qeydiyyata alınıb.
ABŞ hökumətinin fəaliyyətinin rəsmi olaraq oktyabrın 1-də Bakı vaxtı ilə səhər saat 8:01-dən dayandırılması investorların etimadına birbaşa təsir göstərib. Konqresin büdcə razılaşmasına gələ bilməməsi maliyyə sabitliyinə dair riskləri artıraraq dolların qlobal bazarlarda zəifləməsinə yol açıb.
Maliyyə analitiklərinin məlumatına görə, artan qeyri-müəyyənlik qızılın qiymətini sürətlə yüksəldib və investorların tələbini artırıb. Bundan əvvəl qiymətli metal 3 850 dollar/unsiya səviyyəsini keçmişdi. Paralel olaraq, gümüşün qiyməti də yüksəlib və 2011-ci ilin mayından bəri ilk dəfə bir unsiya üçün 47 dolları ötüb.
