BakuTime.com-un məlumatına görə, Şəkidə keçirilən tədbir bölgədə fəaliyyət göstərən kiçik və orta sahibkarları maliyyə resursları və dövlət dəstəyi mexanizmləri ilə tanış etmək məqsədi daşıyıb. Görüşdə həm paytaxt, həm də region sahibkarları iştirak edərək qarşılıqlı əməkdaşlıq imkanlarını müzakirə ediblər.
Tədbirdə Şəki şəhər iqtisadi potensialı və sahibkarlığın inkişafına göstərilən dəstək ön plana çıxarılıb. Çıxışlar zamanı dövlətin təqdim etdiyi güzəştli kreditlər, subsidiyalar və alternativ maliyyələşdirmə alətləri barədə geniş məlumat verilib.
Görüş Kiçik və Orta Biznesin İnkişafı Agentliyi (KOBİA) və “Marsol Group”un təşkilatçılığı, Şəki Şəhər İcra Hakimiyyəti və İş adamları Cəmiyyətinin Milli Assosiasiyasının (İCMA) dəstəyi ilə keçirilib. Tədbirə qida, kənd təsərrüfatı, turizm, İKT və tikinti sahələrində fəaliyyət göstərən 50-dən çox sahibkar qatılıb.
Şəki Şəhər İcra Hakimiyyətinin başçısı Elxan Usubov, KOBİA-nın İdarə Heyətinin sədri Orxan Məmmədov və “Marsol Group”un təsisçisi, İCMA-nın İdarə Heyətinin sədri Tural Mustafayev çıxış edərək sahibkarlara dəstək və xidmətlər, bizneslər arasında əməkdaşlıq imkanları və bölgənin iqtisadi potensialı barədə məlumat veriblər.
Tədbirdə Şəkinin kənd təsərrüfatı, sənaye və turizm sahələrindəki potensialı vurğulanıb. Rayon ipəkçilik, üzümçülük və meyvəçilik ənənələri ilə yanaşı müasir aqrar texnologiyalar və emal sənayesi ilə inkişaf etdirilir. Mədəni irs və infrastruktur layihələri Şəkini investorlara cəlbedici edir, yeni təsərrüfatların qurulması isə məşğulluğu artırır.
Çıxışlarda həmçinin yerli sahibkarların Bakıdakı iş adamları ilə əməkdaşlığı genişləndirməsi, rəqəmsal iqtisadiyyatdan faydalanması və dövlət dəstək mexanizmlərindən istifadə qaydaları barədə tövsiyələr verilib. Tədbir çərçivəsində sahibkarların maliyyə resurslarına çıxışı, lisenziyalar, gübrə idxalı, beynəlxalq yükdaşımalar və vergi inzibatçılığı üzrə müraciətləri dinlənilib.
