Məhkəmə prosesinin nəticəsi bu gün elan edilib. Hakim Hafiz Nəsibovun sədrliyi ilə keçirilən iclasda əvvəlki məhkəmə instansiyalarının çıxardığı qərar qüvvədə saxlanılıb.
Hadisə ilə bağlı ittiham aktında qeyd olunub ki, 1991-ci il təvəllüdlü Asif Manafov 2017-ci ilin yanvar ayında Ağsu rayonunda 1999-cu il təvəllüdlü A.Qəhrəmanovanı şəxsi münasibətlər zəminində qətlə yetirib. Daha sonra meyit müxtəlif şəxslərin iştirakı ilə gizlədilib.
Şəki Ağır Cinayətlər Məhkəməsinin hökmünə əsasən, A.Manafov 13 il müddətinə azadlıqdan məhrum edilib. Apellyasiya instansiyası da bu qərarı qüvvədə saxlamışdı. Sonuncu mərhələdə Ali Məhkəmənin də kassasiya şikayətini rədd etməsi ilə hökmün dəyişdirilmədən qüvvədə qalmasına qərar verilib.
Qeyd olunur ki, işdə adı keçən digər şəxslər Bilal Vəliyev və Arif Manafov barəsində ayrıca icraat aparılıb. Onların cinayət məsuliyyətinə cəlb edilmə müddəti bitdiyi üçün cəza təyin olunmayıb.
