Milli Məclisin Müdafiə, təhlükəsizlik və korrupsiya ilə mübarizə komitəsinin onlayn iclasında gizir və miçmanların hərbi xidmət müddəti ilə bağlı dəyişiklik layihəsi təqdim olunub. Sənəddə ehtiyatda olma yaş həddinin ayrı-ayrı kateqoriyalar üzrə müəyyənləşdirilməsi nəzərdə tutulur.
Hazırlanan layihəyə əsasən, birinci dərəcə ehtiyatda olan gizir və miçmanlar üçün yaş həddi 35, ikinci dərəcə üçün 45, üçüncü dərəcə üçün isə 55 yaş olaraq təklif edilir. Bununla yanaşı, xüsusi təyinatlı hərbi təhsil müəssisələrini bitirənlər üçün həqiqi hərbi xidmətdə qalma müddətinin 10 ilə qədər uzadılması nəzərdə tutulur.
Layihədə həmçinin “40 yaşınadək hərbi vəzifəlilər” ifadəsinin dəqiqləşdirilməsi və qanunvericilikdə müvafiq terminlərin yenilənməsi planlaşdırılır. Bu dəyişikliklər peşəkar kadrların hərbi sistemdə daha uzun müddət saxlanılmasını hədəfləyir.
Hazırda qüvvədə olan qanuna görə, üçüncü dərəcə ehtiyatda olan gizir və miçmanların yaş həddi 50-dir. Yeni təklif qəbul edildikdə, bu rəqəm 55-ə qaldırılacaq.
