Fevralın 2-dən 3-nə keçən gecə keçirilən əməliyyat nəticəsində Daxili İşlər Nazirliyi və Dövlət Sərhəd Xidmətinin əməkdaşları Xəzər dənizində narkotik qaçaqmalçılığı ilə məşğul olan şəxsləri saxlayıb. Təqsirləndirilənlərin idarə etdiyi qayıqlardan marixuana, heroin və metadon həbləri aşkar edilib.
İbtidai istintaq Baş Prokurorluğun İstintaq idarəsində aparılıb və toplanmış sübutlar əsasında cinayət işi Sumqayıt Ağır Cinayətlər Məhkəməsinə göndərilib.
İran İslam Respublikası vətəndaşları Eydməhəmməd Anamhəmməd oğlu Kəlte, Hacı Əbdülnasir İlyas oğlu Muradi, Şərif Rəcəbməhəmməd oğlu Fərdcu, Fərzad Anatağun oğlu Kər, Qaffar Nurməhəmməd oğlu Qızıl və Behzad Əbdülqəfur oğlu Qaranejad mütəşəkkil dəstə kimi fəaliyyət göstərməkdə ittiham olunur.
Əməliyyat zamanı birinci qrup Şahdəniz yatağının cənub-şərqi istiqamətində, digər qrup isə Sumqayıt sahilində saxlanılıb. Saxlanılan qayıqlardan 11 kq 25 qram marixuana, 1 kq 370 qram heroin və 4400 ədəd metadon həbləri götürülüb.
Təqsirləndirilən şəxslər Cinayət Məcəlləsinin 206.4 (mütəşəkkil dəstə tərəfindən törədilən qaçaqmalçılıq), 234.4-1-ci (xüsusi külli miqdarda narkotik vasitələrin qanunsuz dövriyyəsi) və 318.2-ci (Azərbaycanın mühafizə olunan sərhədini qanunsuz keçmək) maddələri ilə ittiham olunub.
Məhkəmə prosesi hazırda Sumqayıt Ağır Cinayətlər Məhkəməsində davam edir və hadisənin bütün təfərrüatları qanuni araşdırmalar əsasında müəyyən ediləcək.
