Milli Məclisin Müdafiə, təhlükəsizlik və korrupsiya ilə mübarizə komitəsinin bugünkü iclasında hərbi xidmətlə bağlı qanunvericilikdə dəyişikliklər nəzərdən keçirilib. Təklif olunan dəyişikliklər ehtiyatda olan hərbi vəzifəlilərin çağırış müddətini tənzimləməyi hədəfləyir.
Layihəyə əsasən, birinci dərəcəli ehtiyatda olan hərbi vəzifəlilər hər dəfə 1 ayadək müddətə, on dəfəyədək təlim toplanışlarına cəlb edilə biləcək. Eyni zamanda, müvafiq icra hakimiyyətinin ehtiyatında olan hərbi vəzifəlilərin hər dəfə 2 ayadək müddətə, beş dəfəyədək toplanışlara çağırılması nəzərdə tutulur.
Hazırda qüvvədə olan qanuna görə, birinci dərəcəli ehtiyatda olan hərbi vəzifəlilər hər dəfə 2 ayadək müddətə, beş dəfəyədək təlim toplanışına cəlb olunur. Digər kateqoriyaya aid hərbi vəzifəlilər isə hər dəfə 2 ayadək müddətə, on dəfəyədək toplanışlarda iştirak edə bilirlər.
Yeni dəyişikliklərin qəbul olunacağı halda, çağırış müddətlərində fərqli məhdudiyyətlərin tətbiqi ilə ehtiyat qüvvələrin təlim prosesində yeniliklər gözlənilir.
