Anthropic şirkəti ən son süni intellekt modeli Claude Sonnet 4.5-i ictimaiyyətə təqdim edib. Yeni model, uzunmüddətli müstəqil fəaliyyət bacarığı ilə seçilərək süni intellekt bazarında rəqabəti yeni mərhələyə daşıyır.
Şirkətin açıqlamasına görə, modelin əsas yeniliyi fasiləsiz və müstəqil şəkildə mürəkkəb tapşırıqları yerinə yetirməsidir. Bu göstərici, əvvəlki nəsil modellərlə müqayisədə əhəmiyyətli texnoloji irəliləyiş hesab olunur.
Claude Sonnet 4.5-in sınaqları zamanı model tam müstəqil şəkildə mürəkkəb funksiyalara malik çat tətbiqi hazırlayıb. Təcrübədə model 30 saat ərzində 11 minə yaxın sətir kod yazaraq tapşırığı uğurla başa çatdırıb. Bu nəticə, əvvəlki versiyanın 7 saatlıq göstəricisindən xeyli yüksəkdir.
Anthropic nümayəndələri bildiriblər ki, yeni model yalnız kodlaşdırmada deyil, həm də təşkilati işlərdə effektiv nəticələr göstərir. O, müxtəlif şəxslərin təqvimlərini yoxlayaraq görüşlərin planlaşdırılmasını həyata keçirə, iclas qeydlərinə əsaslanan xülasələr hazırlaya bilir.
Claude Sonnet 4.5 həmçinin kibertəhlükəsizlik, maliyyə xidmətləri və elmi araşdırmalar sahələrində də sınaqdan keçirilib. İstifadəçilərin rəylərinə əsasən, model uzunmüddətli və mürəkkəb əməliyyatlarda sabit və dəqiq performans nümayiş etdirib.
Yeni versiyanın təqdimatı ilə yanaşı, Anthropic Claude Agent SDK adlanan yeni inkişaf alətlərini də ictimaiyyətə təqdim edib. Bu alətlər sayəsində proqramçılar öz süni intellekt agentlərini yarada və müxtəlif virtual mühitlərdə tətbiq edə biləcəklər.
Mütəxəssislərin fikrincə, Claude Sonnet 4.5-in istifadəyə verilməsi süni intellekt sahəsində agent əsaslı yanaşmaların güclənməsinə təkan verəcək. Şirkətin əsas məqsədi bu istiqamətdə bazar mövqeyini möhkəmləndirməkdir.
