Dövlət Sosial Müdafiə Fondunun cari ildə sosial xərcləri əvvəlki illə müqayisədə nəzərəçarpacaq dərəcədə çoxalıb. Rəsmi məlumatlara görə, 2025-ci ilin yanvar-avqust ayları ərzində fondun büdcə xərcləri proqnozlaşdırılandan daha yüksək olub.
Milli Məclisin müvafiq komitəsinin üzvləri bildiriblər ki, artım həm sosial müavinət və təqaüd alanların sayındakı çoxalma, həm də yeni sosial paketlərin icrası ilə bağlıdır.
Məlumata görə, 2025-ci ilin ilk 8 ayında DSMF-in xərcləri əvvəlki ilin analoji dövrü ilə müqayisədə 9,3 faiz artaraq ümumilikdə 424,6 milyon manat çoxalıb. Deputat Vüqar Bayramovun açıqlamasına əsasən, sosial müavinət alanların sayı 13 min nəfər artaraq 466 210 nəfərə çatıb. Eyni dövrdə təqaüd alanların sayı da 4 244 nəfər yüksələrək 405 644 nəfər olub.
Bu dövrdə ümumilikdə aylıq müavinət və təqaüd alanların sayı 17,3 min nəfər artıb. Həmçinin, proaktiv qaydada 105 665 sosial müavinət və təqaüd təyin olunub ki, bu da ötən illə müqayisədə 5 minə yaxın çoxdur. Rəsmi statistikaya görə, pensiyaçıların sayı da 2,3 min nəfər artaraq 1 103 300 nəfərə çatıb.
DSMF-in 2025-ci il üçün təsdiq olunmuş büdcəsində 7 milyard 676 milyon manat xərcləmə nəzərdə tutulub. Bu, ötən ilki göstəricidən təxminən 10 faiz çoxdur. Fondun əsas fəaliyyət istiqamətlərində pensiya, müavinət, təqaüd, ünvanlı sosial yardım və sosial sığorta ödənişlərində artımlar gözlənilir.
Gəlirlərlə bağlı açıqlanan rəqəmlərə görə, fondun 2025-ci ildə ümumi gəlirləri 7 milyard 617 milyon manat səviyyəsində proqnozlaşdırılır. Habelə, məcburi dövlət sosial sığorta haqları üzrə 5 milyard 997 milyon manatlıq yığımın həyata keçiriləcəyi nəzərdə tutulub.
